Ambasaderi Suzan Rice arahabwa amahirwe menshi yo gusimbura madame Hillary Clinton ku mwanya w'umunyamabanga wa Leta Zunze Ubumwe za Amerika

Perezida Obama, Amb Rice Suzan hamwe na madame Hillary Clinton

Amakuru agera ku Umuvugizi yemeza ko nyuma y'aho madame Hillary Clinton asabiye kutongera kuba umunyamabanga wa Leta Zunze Ubumwe za Amerika, ushinzwe ububanyi n'amahanga, amahirwe menshi kugeza ubu arahabwa madame Suzan Rice, wari uhagarariye iki gihugu muri Loni.

Impamvu Abanyamerika benshi n'inshuti zabo baha Suzan Rice amahirwe yo gusimbura madame Hillary Clinton kuri uriya mwanya, nyuma y'uko Hillary Clinton avuze ko agiye kuruhuka, nuko Suzan Rice ari umwe mu bakozi ba Leta Zunze Ubumwe za Amerika ufite uburambe mu bibazo birebana n'ububanyi n'amahanga, akaba yaranakoze muri Department ya Leta y'iki gihugu igihe kinini.

Izindi mpamvu zituma Suzan Rice ahabwa amahirwe yo kuba umunyamabanga wa Leta Zunze Ubumwe za Amerika, nuko ari umwe mu bakozi b'iki gihugu usobanukiwe cyane n'ibibazo biri muri Syria hamwe no muri Afurika, dore ko Afurika ubu ifite ikibazo cy'abanyagitugu badashaka kuva ku butegetsi, ari na ko bagiye batera ubwoba abaturage babo kugirango be kugira icyo babavugaho ku bijyanye n'igitugu bayoboresha ibihugu byabo.

Tukaba tuzakomeza kubagezaho iby'iyi nkuru mu minsi itaha, perezida Obama amaze kugena uzasimbura Hillary Clinton kuri uyu mwanya, dore ko usaba uburambe n'ubushishozi bihagije.

Gasasira, Sweden.

http://www.umuvugizi.com/?p=7047

Byashyizweho na editor on Nov 16 2012. Filed under Ahabanza, Amahanga, Amakuru Ashyushye. You can follow any responses to this entry through the RSS 2.0. You can leave a response or trackback to this entry